GENERAL SANTOS CITY – Gipailawom sa mass drug testing ang mga opisyales, department heads, mga empleyado sa lokal nga panggamhanan sa Malungon, lakip mga sundalo, pulis og mga sakop sa BFP sa maong munisipyo.
Gipangunahan kini ni Malungon Mayor Tessa Constantino og iyang amahan nga si kanhi Municipal mayor og kasamtangang ‘Task Force Duterte chairman’ Reynaldo ‘Bong’ Constantino.
Human sa flag raising ceremony, gilayong gimando sa mayor ang pagsirado sa municipal gymnasium og gianunsiyo ang pagpahigayon ug drug test sa tanan.
Una niini, nakadawat ug report si Mayor Constantino nga pipila sa mga empleyado sa munisipyo ang gi-alegar nga subling gagamitan sa ilegal nga druga.
Wala pa gipanganlan ang maong empleyado apan gikabutyag nga wala makalusot sa drug test human nga nagsumitar sa iyang urine sample.
Alayun niini, subling nagpahimangno si Mayor Constantino, kinsa kanhi legal officer sa PDEA-12 ngadto sa tanang mga empleyado nga wala siya gabinuang sa kampanya kontra sa ilegal nga druga.
Kahibaluan, unang gimando sa Mayor ang pagsirado sa gym niadtong alang sa ipahigayong drug test niadtong 2016.
