GENERAL SANTOS CITY – Nagpadayon ang gihimong pag-ila sa kapulisan sa suspek nga nagmasaker sa mga taga Purok 5 Luayan, Dumadalig, Tantangan, South Cotabato hinungdan sa kamatayon sa upat ka biktima samtang laing usa ang nadala sa tambalanan.
Giila sa kapulisan ang mga namatay nga silang Jerry Yuarata, Ronald Vallespin, Argie Villorente ug Marcelo Combiz pulos hamtong ug residente sa maong lugar samtang ang nasamdan giila lamang nga si Alias Cris.
Una matud pa nahitabo ang mangilngig nga krimen nagpa blessing ug balay ang usa sa mga biktima hinungdan nga nagkatigum sa lugar .
Paghidangat matud pa sa alas dyes sa gabii usa ka wala maila nga lalaki ang miabut sa lugar ug gipangpusil ang mga biktima.
Gumikan sa mga samad nga naangkon sa mga biktima on the spot nga namatay ang upat samtang nadala pa sa hospital ang laing usa.
Nakuha sa crimescene ang mga basyo sa 5.56 caliber nga sagad ginagamait sa armalite rifle.
Kini na ang gikonsidera sa kapulisan nga pinaka ngilngig nga krimen nga nahitabo sa region 12 ning tuiga.
