GENERAL SANTOS CITY – Nagmalampuson ang natigayong launching sa MASA MASID kon Mamamayang Ayaw Sa Anomalya, Mamamayang Ayaw Sa Iligal na Droga sa Department of Interior and Local Government kon DILG sa Sarangani.
Gipangunahan kini mismo ni DILG Sec. Mike Sueno, ug gitambungan sa mga opisyal sa mga lokal nga panggamhanan sa probinsya.
Ang maong panagtigom ang may tumong nga mas mapalig-on ug mapahugtan ang kampanya sa gobyerno batok sa iligal nga droga ug kurapsyon.
Dungan niini, gipaniguro sa kalihim nga sinsiro si Pangulong Rodrigo Duterte sa kampanya niini batok sa iligal nga droga ug kurapsyon.
Gilakbitan usab ang kalabot sa mga police scalawags kung asa gipasalig niini ang pagkasensiro sa pangulo aron mapalagpot ang mga nahisgutang abusado ug hiwi nga pulis.
Samtang, atul sa maong panagtigom, gipresenta usab sa kapulisan ang statistical report sa ilang mga nahimong accompishment, ingon man ang sa bahin sa PDEA-12 pinaagi ni Dir. Gil Castro.
Base sa gipagawas nga report sa PDEA, sa North Cotabato, 543 ka mga barangay kon 99.4 percent ang apektado sa iligal nga droga ug tulo ang dili. Sa GenSan-100 percent kon tanang 22 ka barangay ang may mga nalambigit sa iligal nga droga.
Ingon usab sa South Cotabato kung asa apektado sa iligal nga droga ang tanang 199 ka barangay sa probinsya.
Sa Sultan Kudarat, 243 ka barangay kon 97.6 percent ang drug affected ug unom ang dili.
Sa Sarangani, 134 kon 95 percent sa ilang mga barangay ang apektado sa iligal nga droga ug pito ang dili.
Ug sa kinatibuk-an, 98.6 sa tibuok mga barangay sa Soccksargen ang gikabutyag nga apektado sa iligal nga droga.
