Nakagawas na sa pagkabilanggo si Mary Jane Veloso human siya gihatagan og absolute pardon ni Presidente Ferdinand Marcos Jr.
Emosyonal nga migawas si Veloso sa Correctional Institution for Women sa Mandaluyong City , dala ang dokumento sa iyang absolute pardon.
Gipasalamatan ni Veloso si Presidente Marcos human siya gihatagan og pardon ug higayon nga makabalik sa iyang pamilya.
Matud niya, dili pa ulahi ang tanan ug aduna pa siyay higayon nga mabantayan ang iyang mga anak.
Gipirmahan ni Presidente Marcos ang absolute pardon kang Veloso niadtong Septiyembre 24.
Niadtong Disyembre 2024, gibalhin si Veloso ngadto sa kustodiya sa Pilipinas human sa pipila ka tuig nga pagkabilanggo sa Indonesia.
Gisentensiyahan si Veloso og kamatayon tungod sa pagdala og iligal nga droga ug gitakdang bitayon pinaagi sa firing squad niadtong Septiyembre 2015. Apan sa ulahing higayon, nadakpan ang babaye nga giingong nag-recruit kang Veloso ug gipasaka og kaso nga human trafficking, hinungdan nga nahimong prosecution witness si Veloso.
