Gikumperma sa Malacañang nga mipahawa sa ilang mga puwesto ang duha ka undersecretary sa Department of Health (DOH).
Sumala ni Palace Press Officer Atty. Claire Castro, ni-resign sa ilang mga posisyon si Financial and Supply Chain Management Services Undersecretary Randy Escolango ug Undersecretary for Universal Health Care-Health Services Cluster Lead for Luzon Dr. Glenn Mathew Baggao.
Dugang pa ni Castro, nag-atubang usab og mga reklamo sa Office of the Ombudsman ang duha ka opisyal.
Si Baggao, nga gitudlo isip Health Undersecretary for Public Health Service Cluster niadtong 2024, nag-atubang og graft complaint nga gisang-at sa Concerned Health Workers niadtong Abril.
Base sa grupo, gilapas matud pa ni Baggao ang Anti-Graft and Corrupt Practices Act human nakakuha ang iyang igsoon og mga infrastructure project nga mokabat sa P140 milyon, apil na ang mga proyekto alang sa mga pagpaayo ug pagtukod sa mga pasilidad sa panglawas, atol sa iyang termino.
Samtang si Escolango, nag-atubang usab og reklamo uban ni kanhi Health Secretary Teodoro Herbosa niadtong Hunyo may kalabotan sa pagtudlo sa pipila ka importanteng posisyon ug sa giingong pagsalikway sa “standard fiscal checkpoint.”
