GENERAL SANTOS CITY – Mas gipahugtan pa sa Makar Police Station ang imbestigasyon sa motibo og responsable sa pagpamusil-patay sa duha ka lalake nga gikabutyag nga salvage victim ug gilabay duol sa Sanitary Landfill sa Sinawal ning dakbayan.
Matud pa ni City PNP Director Col. Nicomedez Olaivar sa Makar Police Station nga nagpahigayon og background check ang kapulisan sa mga biktima nga silang Almisal Abissani 21 anyos nga taga Purok Mudia, Labangal ug Wahab Kasim 23 anyos nga residente sa Purok Pandian Barangay Labangal ning dakbayan.
Pulos samad pinusilan sa ulo ang naangkon sa mga biktima nga gituhu-an sa kapulisan nga gihimo ang krimen sulod sa sakyanan tungod sa mga bu-ak nga salamin ang narekober sa lugar.
Ang kapulisan ang nakig-alayon usab sa pamilya sa mga biktima alang sa dugang imbestigasyon. Gumikan niini gimando sa maong opisyal sa tanang unit sa PNP nga mas palapdan og paglig-onon pa ang intelligence monitoring sa syudad alang sa kahapsay og kalinaw.
