GENERAL SANTOS CITY – Hingpit nang gipagawasan sa korte ug warrant of arrest si Maitum Mayor Alexander Bryan Reganit may kalabotan sa giatubang nining kasong murder.
Ang warrant of arrest ang pirmado ni Presiding Judge Jill Rose Jaugan-Lo sa Regional Trial Court Branch 14 sa Davao City. Matud pa, gitudlo si Mayor Reganit nga suspek sa pagpatay kang kanhing Maitum Mayor George McPerson Perrett.
Giangkon sa asawa nga si Mrs. Elsie Ruge Perett, kinsa nahimo usab nga mayor sa Maitum kaniadto nga dako ang kalipay niya nga migawas na sa hingpit ang warrant of arrest batok kang Mayor Reganit human ang halos tulo ka tuig niya nga pagpaabot.
Nanawagan kini sa publiko ilabina sa katawhan sa Maitum nga tabangan siya nga maaresto si mayor Reganit aron mahatagan na ug hustisya ang bana..
Kahinumdman nga gi-ambush si Perrett kaniadtong Pebrero 28, 2014 samtang pauli na sa ilang balay kauban ang pag-umangkon, sekretarya niini og ang asawa gikan sa piyesta.
Niadtong tungura, walay security detail si Mayor George Perrett og maoy nagmaneho og sakyanan. Dihang gipaarakan ug bala ang ilang sakyanan, naigo kini sa paa niini hinungdan nga gidala sa St. Elizabeth Hospital sa GenSan.
Apan pagka-alas 2:30 sa kaadlawon sa Marso uno, nakabsan kini sa kinabuhi human nga giatake sa kasingkasing dihang nahutdan og dugo.
Nasayran nga nasikop na ang ubang suspek nga silang Basher Sanday, Suharto Abub akar, Alias Kits, Abdulradzak BAndali Dimaudtang, Alias Uno, Amersarat Darayo, Edgar Improgo, Alias Toto.
Nasikop na usab ang ubang suspek nga silang ISmael Dimaugtang Sr, Mohaliden Pinto, og Ismael Kamid.
Kahibaluan nga kasamtangang mayor karon sa Maitum mao si Vice Mayor Tito Balason.
