GENERAL SANTOS CITY – Patay ang mag-inahan sa natigayong aksidente sa Crossing Palkan pasulod sa Brgy Koronadal Proper.
Sa imbestigasyon sa kapulisan, parehong gisubay sa van ug traysikel ang national highway paingon sa direksyon sa Tupi, South Cotabato. Paliko unta ang traysikel sa dihang kalit nga mibangga sa likod ang van nga gimaneho ni Spo1 Ritchie Villagracia, kinsa nadestino sa Cotabato City.
Sa kakusog sa pagkabangga, nalagpot sa pikas nga linya sa dalan ang traysikel, ug nabangga usab ang kotse nga maneho ni Alfred Dacayo.
Tungod sa nahitabo, nangalagpot ang mga sakay sa traysikel. Samdan ang traysikel driver nga si Tonton Matanod og usa ka sakay niining si Olivia Matanod.
Nadala pa sa ospital ang mag-inahan nga si Jinkee Matanod og anak niining si Duelo Paglangan, kuwatro anyos apan nakabsan gihapon sa kinabuhi.
Nasayran nga nagpatuman og 60 kilometers kada oras nga speed limit sa national highway sa Polomolok.
Kahibaluan nga ang van ang naka-escort sa usa ka opisyal sa dihang natigayon ang disgrasya. Pagkakaron, kustodiya sa kapulisan ang van nga nakarehistro sa LGU-Cotabato.
