GENERAL SANTOS CITY – Patay ang mag-amahan sa nahitabong panagbangga tali sa motorsiklo ug SUV alas 12:30 ang takna sa hapon, kagahapong adlawa.
Nahitabo ang maong insidente sa national highway sa Digos-Makar road partikular sa purok 8, Brgy.Katangawan. Sa report sa Traffic Enforcement Unit (TEU) pinaagi ni PLt.Dominador Palgan Jr. narespondihan nila ang insidente alas 12:36 sa hapon ug nakita nakita sa lugar ang nagkatag nga lawas sa tulo ka mga biktima, nga gilangkuban sa amahan nga si Anecito Amoguis, 43-anyos,minyo ug residente sa purok 12, Barangay Olympog ning Syudad, ug duha ka gamayng anak niini nga silang John Paul, 6-anyos ug Trixie, 5-anyos.
Samtang ang SUV nga usa ka Montero ang gimanehuan ni Fernando Letigio, 46-anyos, minyo ug residente sa Purok Lampan, Brgy.Alegria, Alabel, Sarangani Province.
Sa kakusog sa impact, natupi ang unahan nga bahin sa SUV, ug nadaut usab ang wala nga bahin sa Bajaj nga motorsiklo.
Nadala pa sa ospital ang mag-amahan, apan unang gideklara sa doctor nga patay si John Paul ug sunod ang amahan nga si Anecito ug ikatulong gideklarang patay si Trixie.
idala usab sa ospital ang driver sa SUV alang sa medical examinations. Sa pikas bahin, pulos usab gikostudiya sa TEU ang duha ka sakyanan nga nalambigit sa insedente.
