GENSAN – Nagsilbing paboritong parte sa pista ang “Sugbahan sa Dalan 2025” nga gipahigayon sa Pioneer Avenue diin libu-libong mga Generals ang midagsa aron makig-ambit sa kalipay ug lami nga pagkaon.
Ang maong kalihukan usa sa mga highlight sa Tuna Festival diin gitanyag ang daghang klase sa tuna dishes ug uban pang lokal nga pagkaon nga giandam sa mga nagkalain-laing exhibitors, restaurateurs ug food entrepreneurs sa syudad.
Ang dalan misidlak sa makapahimuot nga dekorasyon, musika ug pasundayag samtang naglambigit ang katawhan sa panagsaad ug panagsadya.
Mitambong sa kalihukan si Mayor Lorelie Geronimo Pacquiao kauban ang mga opisyal sa dakbayan ug gisuportahan usab kini sa mga bisitang dignitaries sama ni Senador Mark Villar.
Gipangunahan nila ang tradisyunal nga tuna slicing ug tuna lechon tasting nga mao ang pinakahighlight sa gabii. Samtang mitambong sa kalihukan, nagpasalamat si Senador Mark Villar tungod kay siya mismo nakasaksi kung giunsa ka engrande ug makapahimuot ang pagpatigayon sa Sugbahan sa Dalan.
Gipasabot niya nga ang pagdagsa sa katawhan ug ang kahapsay sa kalihukan timaan sa lig-on nga kultura ug pagkahiusa sa mga Generals.
Matod ni Mayor Pacquiao, ang Sugbahan sa Dalan dili lamang usa ka pista kondili usa ka timaan sa pagkahiusa ug kinabuhi sa industriya sa tuna nga mao’y nagpasiugda sa ekonomiya sa General Santos City.
Dugang pa niya, dako kini’g papel sa pagdani sa turismo ug sa paghatag og oportunidad sa mga lokal nga negosyante.
Samtang nagpadayon ang kalihukan, ang mga bisita ug residente midayeg sa kahapsay sa seguridad ug sa kalipay nga ilang nasinati, nga nagpakita nga ang Tuna Festival nagpabiling lig-on nga tatak sa pagkatawo sa mga Generals._
Ang Sugbahan sa Dalan 2025 usa ka malampusong pasundayag sa kultura, pagkaon ug pagkahiusa sa dakbayan sa General Santos.
