Basi sa gipagawas nga report sa Department of Energy (DOE), 5,000 ka mga panimalay gikan sa nagkadaiyang dapit sa nasod ang gikatakdang makutayan og koneksyon sa elektrisidad sa dili pa matapos ang kasamtangang tuig.
Dugang pa kini sa 17,000 ka mga panimalay nga gitarget kaniadto sa niaging mga tuig ubos sa Total Electrification Project (TEP) sa National Electrification Administration (NEA).
Kahinomdoman nga sa 4th State of the Nation Address (SONA) ni Presidente Ferdinand Marcos Jr., nakatutok kini sa DOE ug NEA sa pagkonektar sa minilyon ka mga panimalay sa kuryente sa dili pa matapos ang iyang termino sa 2028.
Basi sa datos sa DOE, moabot sa 2.018 milyones ka mga panimalay nga sa pagkakaron walay kuryente nga nasakopan sa electric cooperatives ug distribution utilities.
Busa, mamahimo na kining makonektar sa kuryente pinaagi sa regular nga mga aplikasyon sa serbisyo uban sa tabang sa mga sakop nga kooperatiba.
Ang DOE nagkanayon nga nakig-alayon sila sa Department of the Interior and Local Government (DILG) aron mapadali ang koneksyon, ilabina sa mga kabus nga pamilya.
Lakip sa mga lakang nga mahimong ibutang alang niini mao ang usa ka mas paspas nga proseso sa pagtugot, ug usa ka pagkunhod o hingpit nga waiver sa mga bayronon sa koneksyon nga gipahamtang sa mga lokal nga gobyerno, ug uban pang angay nga tabang.
