GENERAL SANTOS CITY – Nanawagan si Kag. Ramon Milleza sa katawhan ning dakbayan nga padayon nga magmaigmat ug mabinantayon sa mga gakahitabo. Kini hilabi na sa taho nga nakasulod sa siyudad ang Maute-ISIS, partikular ang napatay sa raid nga si Najib Pundog nga usa matud pa ka bomb expert sa grupo, ug ang nasikop nga si Nafisah Pundog nga asawa sa lider sa grupo nga si Owayda Marohombsar alias Abu Dar.
Sa pakighinabi sa Bombo Radyo, gibutyag ni Kag. Milleza nga mapasalamaton siya sa Diyos sa kanunay’ng pag-uban ug pagpanalipod sa katawhan sa GenSan, ug sa mga tigpatuman sa balaod pinaagi sa kapulisan ug kasundaluhan nga nahimong maabtik ug nahimong ma-neutralize ang mga terorista.
Mapasalamaton usab matud pa ang lokal nga panggamhanan sa mga indibidwal nga mitabang sa pagpahibalo ug pagtultol sa mga dautang elemento nga nakasulod sa siyudad.
Ug gani, bisan siya ang hugot matud pa ang kanunay’ng pag-ampo sa Ginoo nga dili gayud maguba ang peace and order sa siyudad, ug tabangan ang lokal nga panggamhanan nga mapanalipdan ang katawhan.
Dungan niini, nanawagan si Milleza sa katawhan nga mamahimong proactive ug gilayon nga i-report sa mga otoridad kon ugaling may mamatikdan nga mga kadudahan nga tawo, aron dili mahinayon kon aduna may dautang plano ang mga terorista.
