GENERAL SANTOS CITY – Gapanawagan si Mayor Ronel Rivera ngadto sa katawhan sa GenSan nga paabuton ang schedule sa paghatag og bugas kada barangay.
Kini human nga miabot sa dakbayan ang 192,000 ka sako sa bugas nga tag 25 kilos sa miaging mga adlaw.
Sa maong shipment unang makadawat ang gikan sa Barangay Bula, Tambler ug South.
Isunod ang Siguel, Sinawal, San Jose, Upper Labay, Lagao, Labangal, Calumpang, Fatima, Conel, Tinagacan, Batomelong, Olympog, North, Baluan, Buayan, West, Katangawan og City Heights.
Kahinumduman nga miaging bulan midunggo sa pantalan sa Makar ang barko nga nagkarga ug 50,000 ka sako sa bugas nga nahatag sa lima ka barangay sa syudad.
Una niini gibutyag ni Mayor Rivera, nga ang maong bugas ang kabahin sa iyang saad sa katawhan nga maghatag og 25 ka kilos sa bugas matag panimalay nga nag-antus gumikan sa epekto sa COVID 19.
