GENERAL SANTOS CITY – Dili na problemahon pa sa mga pamilya sa mga pasyente nga gidala sa mga ospital sa dakbayan human sa makusog nga linog ang pambayad sa tambalanan.
Kini human nga gisiguro ni Mayor Lorelie Pacquiao nga dili pasagdan sa syudad ang mga nasampit. Matod pa niini nga ang syudad ang mag-abaga sa mga gastos.
Nasayran nga sa kapin 500 katao nga nadala sa ospital anaa sa 32 ang naadmit human natigayon ang magnitude 6.8 nga linog sa miaging Biyernes sa hapon.
Sa updated report sa mayor kagahapong adlawa anaa sa pito ang nakagawas na sa ospital. Kasagaran sa mga nasampit ang nakuyapan og nalisdan makaginhawa gumikan sa linog apan ang kasagaran kanila ang nakauli na.
Human sa linog, miadto ang mayor sa nagkadaiyang ospital nga gidalhan sa mga nasampit aron personal nga makita ang sitwasyon. Gilayon nga nagmando sa tanang hintungdang ahensya sa gipahigayong emergency meeting nga dili pasagdan ang mga apektado.
