GENERAL SANTOS CITY – Nanawagan karon ang kapulisan alang sa mga nakakita o may kasayuran sa natigayon nga pagpamusil kagahapong adlawa atubangan sa Diagan Hospital, sa Quezon Avenue, Brgy Dadiangas North ning siyudad.
Kini aron matumbok ang ilhanan sa suspek ug sa motibo sa pagpusil-patay sa nagpangalan ug William Manguilimotan, 45-anyos, taga-Malapatan, Sarangani.
Sa pakighinabi sa Bombo Radyo kang P/S/Insp. Reynaldo De Armas, deputy chief of police sa Pendatun Police Station, sa inisyal nga imbestigasyon, natigayon ang pagpamusil alas-11:50 sa udto, kung asa midayo matud pa ang biktima ug mga kauban nga paryente gikan sa Lun Padido, sa nasampit nga lugar aron mukaon.
Pauli na unta matud pa ang grupo biktima dihang nahitabo ang insidente.
Sa karon padayon pa sa pagpangalap ug impormasyon ang kapulisan, kung asa galaum silang makatabang sa imbestigasyon ang testimonya sa mga kauban sa biktima, ug ang CCTV footage sa lugar.
