GENERAL SANTOS CITY – Laing investment scam na usab ang gireklamo sa National Bureau of Investigation- Sarangani District Office (NBI-SarDO) nga misaad ug hilabihan kadakong interes sa ilang mga miyembro.
Kini luyo nga wala pa nahuman ang pagpasang-at ug kaso batok sa mga nagpaluyo sa una nang mibuto nga scam nga mao ang Police Paluwagan Movement kon PPM, kung asa pipila ka batch na sa mga reklamante ang nagpasang-at ug pormal nga reklamo.
Ang labing ulahing gireklamo sa NBI mao ang investment scam nga Diamond Essentials Business.
Matud sa usa ka wala nagpailang reklamante, ang eskema niini, maghulog lamang ug P2,000 ang usa ka miyembro ug makuha human sa tulo ka bulan ug mahimo nang P120,000 basta magpadayon sa pagpang-recruit ug anaa sa tig-upat aron mas mudaghan pa ang mga mamahimong miyembro.
Sumala pa nakatakda na unta silang mudawat sa ilang tig-P120,000 apan kalit nausab ang sistema.
Gikabutyag nga usa ka Marlene Soberio ang matud pa presidente niini kung asa aduna silay buhatan sa may Brgy City Heights ning syudad.
Una niini, unom ka mga reklamante sa Diamond Essentials ang midangop sa NBI tungod ginagukod na matud pa sila sa ilang mga na-recruit.
Sa karon padayon pa sa pagpangalap ug impormasyon ang NBI aron makasugod sa pag-imbestiga kalabot sa gireklamong lain na usab nga investment scam.
