GENERAL SANTOS CITY – Balhog sa selda sa Malungon Municipal Police Station ang usa ka konduktor sa van ruta og Malungon-GenSan og vice versa sa gipahigayon nga buy bust operation sa kapulisan.
Giila ang suspek nga si Jonathan Belhera, 46 anyos minyo nga taga Prk Waling-waling Malandag Malungon Sarangani.
Nakuhaan ang nasampit og usa ka sachet sa gituohang shabu og P500 mark money. Sa pakighinabi sa Bombo Radyo, hugtanong gipanghimakak sa suspek nga iyaha ang maong shabu.
Matud pa, maoy pagnaug niya sa van aron tubilan unta ug tubig ang radiator gidakop siya sa kapulisan.
Hinuon giangkon ni Bellera nga kaniadto migamit siya ug iligal nga droga apan dugay na matud pa siyang miundang.
Sumala usab sa asawa sa suspek nga nagbag-o na ang iyang bana gikan sa paggamitan ug gidiling droga ug gani nagkugi sa pagkunduktor aron mabuhi sila luyo sa tumang kalisod nga ilang nasinatian.
Giandam na ang kasong ipasaka batok sa suspek.
