Pormal nang gisaka sa Office of the Ombudsman ngadto sa Sandiganbayan ang kasong plunder batok kang kanhi House Speaker Martin Romualdez, kanhi Ako Bicol Representative Zaldy Co, ug uban pa, may kalabotan sa giingong anomalya sa flood control kickback scheme.
Gikumpirma kini sa Sandiganbayan Judicial Records Division.
Tungod sa maong bag-ong legal nga lakang, nanawagan ang kampo ni Romualdez alang sa patas nga pagtagad aron mahatagan sila og igong higayon sa pagtubag sa mga bag-ong alegasyon batok kaniya.
Matod ni Atty. Ade Fajardo, legal counsel ug tigpamaba sa kanhi speaker, angay unta nga gipahibalo sila sa Ombudsman kung adunay opisyal nga pahayag si kanhi DPWH Secretary Manuel Bonoan batok kang Romualdez, ilabina nga preliminary investigation pa lamang kaniadto ang kaso.
Gihangyo usab sa legal team ni Romualdez nga makita ang mga pahayag sa 28 ka bag-ong testigo sa Ombudsman aron makapasa ang kanhi speaker sa iyang pormal nga tubag ug kontra-affidavit.
Nagsugod ang pagkadugtong sa ngalan ni Romualdez sa maong kontrobersya niadtong Septiyembre 2025, human siya hinganlan sa pipila ka contractor ug kanhi security personnel atol sa sunod-sunod nga mga hearing sa Senado.
Pipila na ka higayon nga hugot nga gilimod ni Romualdez ang mga akusasyon sa kickback ug iyang gipasiugda nga wala siyay kalabotan sa pagpagawas sa pondo o sa pagpatuman sa mga proyekto sa DPWH.
Milingi usab ang iyang legal team nga wala pay lig-on ug kasaligan nga testigo nga direktang nagdugtong kang Romualdez sa giingong anomalya sa mga flood control project.
