PNP Chief P/Gen. Oscar Albayalde
GENERAL SANTOS CITY -Kapin sa 3,000 ka mga pulis nga gibansay sa Comelec aron mamahimong board of election inspectors kon BEIs sa tibuok nasud alang sa matigayong 2019 midterm elections sa Lunes.
Kini ang gibutyag ni PNP Chief P/Gen. Oscar Albayalde atul sa iyang pagbisita sa PNP 12 Headquarters kagahapong adlawa, kung asa posible matud pang madugangan ang naasoy’ng ihap, depende sa panginahanglanon.
Matud pa nga kapin sa katunga sa naasoy’ng ihap ang gideploy sa Mindanao, alang sa mga gikonsiderang critical areas aron magserbisyo sa piniliay, hilabi na kon muatras ang mga magtutudlo nga magserbisyo sa eleksyon gumikan sa sitwasyon sa lugar.
Samtang, giawhag ni Gen. Albayalde ang publiko nga ireport sa PNP hotlines kon ugaling may makita nga bisan unsang pagsupak sa Comelec rules and regulations atul sa adlaw sa piniliay sama sa vote buying, presensya sa mga armado o walhong grupo, ug uban pa.
Kahibaluan nga ang Police Regional Office 12 nagpakatag na usab sa ilang mga hotline numbers alang sa adlaw sa piniliay.
Kahibaluan nga gatuyok sa tibuok nasud si Gen. Albayalde alang sa pagsiguro nga andam na ang seguridad alang sa matigayon nga eleksyon.
