GENERAL SANTOS CITY – Mukabat sa kapin 300 ka mga negosyo sa Gensan ang hingpit ng nanirado gumikan sa epekto sa covid 19.
Kini ang gibutyag ni Geraldine Zamora, labaw sa City Permits and Licensing Division.
Gibutyag niini nga ang pagsirado sa mga nasangpit nga negosyo ang may epekto sa ekonomiya sa dakbayan. Sa pagsirado sa mga nahisgutan ubay-ubay sa mga empleyado ang nawad-an ug trabaho.
Gipaniguro ni Zamora nga magpadayon ang monitoring ug regular inspection sa tanang establishemento kung asa lakip nga sutaon mao ang mga business permit ug kung ginatuman ang minimum health protocol.
Sumala pa ni Zamora nga kung siya maoy magbuot dili lang ang mga establishemento maoy pahamtangan ug silot kun dili ang mga tawo mismo nga nagasulod nga wala nagatuman sa protocol.
Gumikan subay sa ilahang obserbasyon, adunay mga establishemento ang nagatuman sa protocol nga gitakda sa gobyerno, apan aduna usab mga tawo nga dili kabalo mudisiplina sa kaugalingon.
