Personal nga mitambong kagahapong adlawa, si kanhing Pres. Rodrigo Duterte sa ikatulong status conference sa iyang kaso sa International Criminal Court o ICC sa The Hague, Netherlands.
Mao kini ang unang higayon nga personal nga nagpakita sa publiko ang 81-anyos nga kanhing lider sulod sa kapin usa ka tuig sukad sa iyang kataposang pag-atubang pinaagi sa video link niadtong Marso 2025, human sa iyang pagkadakop.
Mitambong si Duterte sa court room human giklaro ni Presiding Judge Joanna Korner sa ICC Trial Chamber III nga gilauman sa korte ang iyang personal nga presensya human isumite sa mga medical expert ang ilang evaluation report.
Gipunting sa maong pagdungog ang pagtakda sa timetable alang sa pagpresentar sa mga testigo, pagbayloay sa ebidensya sa prosecution ug defense, ug uban pang pagpangandam sa dili pa pormal nga magsugod ang trial nga gikatakdang sugdan sa Nobyembre 30, 2026.
Ang kaso ni Duterte may kalabotan sa mga alegasyon sa crimes against humanity nga nalambigit sa kampanya batok sa ilegal nga droga atol sa iyang panahon isip mayor sa Davao City ug sa ulahi isip Pangulo sa Pilipinas.
Sukad sa iyang pagkadakop niadtong miaging tuig base sa warrant sa ICC, nagpabilin si Duterte ubos sa kustodiya sa korte samtang nagpadayon ang iyang defense team sa mga legal ug medical nga apela.
