Gipanghimakak sa kampo sa beauty queen nga si Samantha Panlilio ang mga alegasyon nga siya kuno nalambigit sa ilegal nga pagdetena ug pagpangbunal sa driver ni Rhian Ramos nga si Bonifacio Baro.
Sumala sa mga abogado ni Panlilio nga sila Atty. Buenaventura Miranda ug Atty. Carl Jon Mucho sa Chavez, Miranda, Aseoche Law Offices, peke ug hinimo-himo lamang ang mga pasangil batok sa ilang kliyente.
Matod pa sa pahayag sa mga abogado, wala pa mabasa ni Panlilio ang formal nga reklamo, apan kompyansa siya nga human sa hustong imbestigasyon, ibasura kini tungod kay wala kini basehan.
Gipadayag usab sa kampo ni Panlilio nga base sa rekord sa Makati City Police, si Baro una nang nadakpan niadtong Enero 19, 2026 tungod sa kasong Qualified Theft ug nadetine hangtod Enero 22, 2026. Bisan pa man nga ang maong kaso gi-dismiss without prejudice, giingon nga gi-file pag-usab kini sa mga awtoridad.
Gidugang pa sa mga abogado nga andam makigtambayayong si Panlilio sa mga may kalabutan nga ahensya sa gobyerno aron limpyo-on ang iyang ngalan.
Nadawit si Panlilio sa kontrobersiya human itudlo ni Baro nga usa siya sa mga miingon niyang nanakit ug nagdetena kaniya sulod sa usa ka high-end condominium unit nga gipuy-an kuno nila Rhian Ramos ug Miss Universe Philippines 2023 Michelle Dee. Matod pa ni Baro, nahitabo ang insidente gikan Enero 17 hangtod Enero 19.
Si Samantha Panlilio mao ang Binibining Pilipinas Grand International 2021 titleholder ug kaniadto usab midagan isip second nominee sa Agimat Partylist sa 2025 elections apan napakyas sa iyang kandidatura
