Gihangyo sa kampo ni kanhing Pangulong Rodrigo Duterte ang International Criminal Court (ICC) Trial Chamber III nga isumite pag-usab ang kaso batok kaniya.
Nagtuo ang defense panel nga gilapas sa prosecution ang katungod sa kanhing pangulo nga mahibal-an ang hinungdan ug sulod sa mga kaso nga gipasaka batok kaniya.
Base sa motion nga gipirmahan ni lead defense counsel Peter Haynes, gikuwestyon niini kung nganong gikinahanglan pa nga iapil ang mga kanhing kaso ni Duterte sa ICC.
Matud sa kampo, ang bugtong epektibong remedyo niini mao ang pagsumite pag-usab sa prosecution sa kaso ug paghatag kang Duterte og klarong impormasyon bahin niini.
Gikahinumdoman nga nag-atubang si Duterte og tulo ka kaso sa crime against humanity tungod sa iyang madugong kampanya batok sa ilegal nga droga atol sa iyang pagkapangulo.
