Misupak ang kampo ni kanhi Rodrigo Duterte sa hangyo sa prosekusyon sa International Criminal Court nga susihon ang mga personal nga gamit nga nahipos atol sa iyang pagkaaresto, nga ilang gihulagway isip usa ka “fishing expedition” o pagpangita og ebidensya nga walay igo nga basihan.
Matod sa lead defense counsel nga si Peter Haynes, dugay nang anaa sa kustodiya sa ICC Registry ang maong mga gamit, apan karon pa lamang kini gustong susihon sa prosekusyon bisan pa nga napamatud-an na ang mga kasong gisang-at batok kang Duterte.
Matod niya, ang maong lakang mahimong hinungdan sa dugang nga pagkalangan sa pagpadayon sa husay. Gisupak usab sa depensa ang hangyo nga usisahon ang tanang mga yawi nga nakumpiska, nga ilang giingong walay klarong kalabutan sa kaso ug mahimong makalapas sa pribasiya sa mga sakop sa pamilya ni Duterte.
Tungod niini, gihangyo sa depensa ang ICC Trial Chamber III nga itakda ang Hunyo 30, 2026 isip katapusang adlaw sa pagsumite sa bisan unsang bag-ong mosyon sa prosekusyon nga may kalabotan sa mga ebidensyang anaa sa ICC Registry, aron malikayan ang dugang nga paglangan sa pagpangandam alang sa umaabot nga pagtaral.
