GENERAL SANTOS CITY – Nahimong malampuson ang pagtapos sa ika-35 nga Kalilangan og ika-85 nga Foundation Anniversary sa Gensan kagabie sa Pioneer Junction.
Kini human nga gidagsa sa liboan ka Heneral gikan sa nagkadaiyang barangay sa dakbayan kauban ang mga opisyal sa syudad sa pagpanguna ni City Mayor Hon. Lorelie Geronimo-Pacquiao, apil usab ang ubang mga bisita gikan sa mga kasikbit nga dapit.
Dili mahulogan og dagom ang Pioneer Junction atol sa gipahigayong closing ceremony kagabie tungod sa kadaghang tawo nga nalingaw sa mga pasundayag.
Mas midugok pa ang mga tawo dihang gipahigayon ang fireworks display nga mihatag og kahayag sa kalangitan.
Ang bagang duot sa mga nagsuroy ang misamot pa dihang nagsugod na ang pagtugtog sa usa ka sikat nga banda sa nasud.
Sumala pa gibanabanaang mikabat sa 400,000 katao ang misalmot sa nasampit nga aktibidad lakip ang mga dayo gikan sa lain pang lugar.
Sa mensahe ni Mayor Pacquiao, gipasalamatan niya ang tanang nahimong parte sa pag-organisa sa selebrasyon.
