GENERAL SANTOS CITY – Gihingusgan ni Kag. Dominador Lagare Jr., Chairperson sa Committee on Transportation sa konseho dinhi sa Dakbayan nga ‘fake news’ ang gipakatag nga matud pa P9,000 ang kinanglang bayran sa driver sa pagpamiyembro sa traysikel cooperative.
Matud pa ni Lagare, may sagol- pamulitika ang nagpakatag niini nga gustong bulabugon ang paghan-ay sa Syudad sa sektor sa transportasyon.
Gibutyag sa Konsehal, anaa lang sa P2,300 ang bayran nga paid-up capital samtang dugang P200 ang membership fee.
Giklaro niini nga ang tanang nagpamyembro maoy maoy tag-iya sa traysikel cooperative.
Pag-abot sa Disyembre sa tuig, may dawaton nga dibedendo ang matag miyembro gikan sa kita sa unsa man ang gipatukod nga negosyo.
Ugaling buot sa miembro nga muhawa sa coop, makuha niini balik ang iyang P2,300 nga paid-up capital.
Alayun niini, giawhag ni Kag. Lagare ang mga drivers nga magpamiyembro na sa coop tungod dako kining bentaha kanila gawas pa nga mahan-ay na ang sektor sa transportasyon sa GenSan
