Misaka na sa 27 ang gidaghanon sa mga namatay tungod sa padayong epekto sa habagat.
Sa usa ka press briefing karong Lunes, gikumpirma ni PNP spokesperson PCol. Allen Rae Co nga 26 sa mga namatay mga sibilyan, samtang usa ang personnel sa PNP.
Gipahibalo usab sa opisyal sa PNP nga adunay duha pa ka indibidwal nga gikatahong nawala, samtang 18 ka tawo ang gikatahong nakaangkon og mga samad, base sa datos niadtong buntaga sa Lunes, Agosto 17.
Gilauman usab nga magpagawas ang pambansang kapulisan og kompletong detalye kalabot sa mga namatay, lakip na kung asa nahitabo ug unsa ang hinungdan sa ilang pagkamatay.
Samtang, padayon ang pagtabang sa PNP sa disaster response, dungan sa pagmintinar sa kalinaw ug kahapsay sa mga lugar nga naapektuhan sa kusog ug padayong pag-ulan.
Base usab sa datos gikan sa Office of Civil Defense (OCD) karong Lunes, sobra lima ka milyon ka tawo ang naapektuhan sa hiniusang epekto sa mga bagyo nga bag-ohay lang mihapak sa nasud ug sa habagat.
Naitala ang mga apektadong pamilya sa Ilocos Region, Cagayan Valley, Central Luzon, Bicol, Western Visayas, Zamboanga Peninsula, Cordillera Administrative Region, Metro Manila ug Mimaropa.
