Nagkauyon ang Hamas ug Israel sa usa ka ceasefire deal ug ang pagpagawas sa mga hostage sa Gaza.
Ang maong kasabotan gihimo human sa meeting sa opisina ni Qatari Prime Minister Sheikh Mohammed bin Abdulrahman bin Jassim al-Thani.
Ang Qatari Prime Minister bulag nga nakigtagbo sa mga representante sa Hamas ug Israel diin silang duha miuyon sa nasangpit nga kasabutan.
Ang maong kasabutan naglatid sa pagpagawas sa 33 ka mga bihag sa Hamas sa dihang ilang gisulong ang Israel niadtong Oktubre 7, 2023.
Sa baylo niini, buhian sa Israel ang pila ka gatos nga mga binilanggo sa Palestinian.
Kung ang giingong kasabutan ang ipahibalo na, ang mga sibilyan sa Palestinian mahimong makabalik na sa amihanang Gaza.
Kahinumdoman nga ang US ug pipila ka mga nasod nga mediator sama sa Egypt ug Qatar maoy nangulo sa mediation aron tapuson ang panagbangi tali sa Hamas ug Israel.
