Nisaad si Iranian Foreign Minister Abbas Araqchi nga gamiton nila ang tanang opsyon sa pagdepensa sa ilang soberanya human gibombahan sa Estados Unidos ang tulo ka nuclear facilities
Agig panimalos, ang Iran naglusad og daghang mga misile paingon sa Israel, nga miigo sa mga siyudad sa Tel Aviv ug Jerusalem, hinungdan sa kadaot sa mga balay, ug pagkaangol sa mga sibilyan.
Miresulta kini sa 16 ka mga naangol.
Gipasidan-an sa Iran nga dili kini mahadlok sa Amerika ug gitawag nga ilegal ang opensiba sa US.
Matod nila, walay radioactive materials nga mahimong mobuto ang nahibilin sa mga pasilidad sama sa Natanz, Isfahan, ug Fordow.
Sa laing bahin, gipasigarbo ni Trump ang iyang “malampuson” nga operasyon samtang gihulga nga sundan kini sa dugang nga pagpamomba kung dili mosurender ang Iran.
Nasayran nga migamit kuno ang US og 30 ka Tomahawk missiles ug bunker-buster bomb sa pagguba sa mga pasilidad sa nukleyar sa Iran.
Base sa datos, kapin sa 430 ka mga tawo ang gitaho nga namatay sa Iran ug 24 sa Israel sukad nagsugod ang panagbangi niadtong Hunyo 13.
Ang mga lider gikan sa lainlaing mga nasud nagpahayag ug kabalaka, tungod ang mga tensyon sa Middle East nagpadayon sa pagdako.
Ang United Nations nanawagan alang sa usa ka hinanaling ceasfire aron mapugngan ang usa ka mas lapad nga gubat.
