Kinahanglan nang ipadayon ang proseso sa impeachment batok kang Vice President Sara Duterte human mahimong lig-on ang pagpangulo sa Senado.
Kini ang gipahayag ni House Committee on Higher and Technical Education Chairperson ug TINGOG Party-list Representative Jude Acidre.
Matud ni Acidre, dili makahatag og kaayohan sa katawhan kung dugayon pa ang maong proseso tungod kay nakasalalay niini ang pagsalig sa publiko sa gobyerno ug sa mga demokratikong institusyon.
Gipasiugda ni Acidre nga normal lamang sa usa ka demokrasya ang nagkalain-laing panan-aw sa mga Pilipino, apan dili kini mahimong rason aron dugayon, samokon, o himuong politikal ang pagdungog sa kaso.
Matud sa magbabalaod, ang labing importante mao nga molihok ang kaso sa patas, hapsay, ug kasaligan nga paagi. Pinaagi niini, matagaan ang duha ka panig og hustong kahigayonan nga ipresentar ang ilang mga argumento ug ebidensya, ingon man matubag ang mga pangutana sa publiko.
Gipahinumdoman usab ni Acidre ang tanan nga ang impeachment kinahanglan ibase sa ebidensya ug kamatuoran, dili pinaagi sa kasaba, pagpamugos, o pamolitika.
Matud niya, kini nga isyu dili lamang mahitungod sa kaugmaon sa usa ka opisyal, kundili usa usab kini ka pagsiguro sa katawhan nga naglihok ang balaod ug mga institusyon sa nasod sa malinawon ug makiangayon nga paagi.Impeachment batok kang VP Sara, kinahanglan nang ipadayon karon nga lig-on na ang liderato sa Senado — Rep. Acidre
