Miabot na sa Pilipinas ang ikatulong 8-car trainset alang sa North-South Commuter Railway o NSCR, Malolos-Tutuban segment, ug kasamtangang gipailalom pa kini sa importation process sa Bureau of Customs. Gikatakdang dad-on kini sa Malanday Depot sa Valenzuela City.
Matud ni Transportation Secretary Banoy Lopez, padayon nga gibantayan ug gimonitor sa Department of Transportation ang konstruksyon sa North-South Commuter Railway.
Sumala pa sa ahensya, ang maong trainset gipalit gikan sa Japan Transport Engineering Company ug Sumitomo Corporation isip kabahin sa Contract Package 03: Rolling Stock o CP03.
Gibanabana nga moabot sa 147 kilometros ang NSCR system nga adunay 35 ka estasyon ug magdugtong sa Central Luzon, Metro Manila, ug Calabarzon.
Gilauman nga hapit 800,000 ka mga commuter matag adlaw ang makabenepisyo sa NSCR kung kini mahimong fully operational na.
Samtang, gilauman usab nga moabot sa Pilipinas ang laing trainset alang sa NSCR sa Oktubre ning tuiga.
Matud sa Department of Transportation, target nga sugdan ang partial operations sa North-South Commuter Railway alang sa ruta gikan sa Valenzuela padulong sa Malolos, Bulacan sa ika-upat nga quarter sa 2027.
