GENERAL SANTOS CITY – Gitutukan sa LGU Malungon ang maayong panglawas sa mga kabataan nga nagtungha sa mga day care center sa lugar.
Kini human gibutyag ni Mayor Tessa Constantino nga napanghatag dayon sa mga day care teacher ang ika trese nga cycle nga paghatod sa mga suplay alang sa Supplementary Feeding Program alang sa 4,700 ka Day Care Pupils isip benepisyaryo sa maong programa sa gobyerno.
Halos dili maarang sulod sa covered court ang mga kinarton nga produkto alang sa feeding program. Kauban ang mga barangay health worker usa-usa nila nga gisusi ang mga sudlanan sa mga pagkaon una gidala sa ilang barangay .
Gipahigayon ang distribusyon sa Sunken Arena, Malungon, Sarangani Province nga gipangunahan sa taga MSWDO Malungon nga mitugyan sa mga benepisyaryo.
Ang Supplementary Feeding Program (SFP) mao ang paghatag ug pagkaon dugang sa regular nga pagkaon sa mga bata nga na-enrol karon sa mga day care centers isip kabahin sa kontribusyon sa DSWD sa Early Childhood Care and Development (ECCD) program sa gobyerno.
Kahinumduman nga duha ka bulan ang nakalabay susama nga distribusyon ang nahitabo sa mao gihapon nga munisipyo.
