Nisaka ngadto sa walo ang ihap sa nangamatay sa sunodsunod nga linog nga miigo sa Davao Oriental niadtong Biyernes, matod sa Office of Civil Defense (OCD), bisan pa man nga ubos pa kini sa verification.
Si OCD Deputy Administrator Bernardo Rafaelito Alejandro IV nagkanayon nga tulo ka tawo ang namatay sa Davao Oriental, upat sa Davao de Oro, ug usa sa Davao City.
Gibanabana nga 267,000 ka tawo sa Rehiyon XI ug 210,272 sa Caraga ang apektado, samtang 11,000 ka evacuees ang nagpabilin sa 18 ka evacuation centers.
Ang lungsod sa Manay, Davao Oriental maoy labing naigo.
Si Alejandro niingon nga ang Davao Oriental Provincial Hospital sa Manay wala na mag-function ug ang mga tambalanan sa Mati ug kasikbit nga mga lugar na-overwhelm na.
Ang Department of Health gikataho nga nagbutang ug temporaryo nga mga tent ug pasilidad nga medikal.
Nanawagan usab si Alejandro sa publiko nga magpabiling kalmado ug mosunod sa mga instruksyon sa mga opisyal sa kalamidad samtang nagpadayon ang mga aftershocks.
