Nanawagan si Senate Committee on Health Vice Chairman Senator Christopher “Bong” Go alang sa mas hugot nga pagpatuman sa balaod nga nagdili sa gitawag nga “hospital detention,” o ang pagpugong sa mga pasyente nga mogawas sa ospital tungod kay wala pa nila hingpit nga mabayran ang ilang hospital bill.
Sigon sa senador, dili angay mahimong hinungdan ang kakulang sa kwarta aron dugangan pa ang kalisod sa mga masakiton sulod sa ospital, ilabina kadtong mga kabus ug lisod ang panginabuhi.
Gipaklaro ni Go nga dili sayon ang pag-atubang sa sakit, ilabina alang sa mga pamilyang kabus nga angayang hatagan og patas, hapsay ug tawhanong pagtagad, samtang kinahanglan usab nga dili maapektuhan pag-ayo ang adlaw-adlaw nga operasyon sa mga health facility.
