GENERAL SANTOS CITY – Lauman unsa mang adlaw ang pagpagawas sa Department of Justice (DOJ) ug hold departure order (HDO) batok sa founder sa Kabus Padatuon o KAPA Communinity Ministry International Inc., nga si Joel Apolinario.
Base kini sa impormasyon gikan sa usa ka reliable source sa Bombo Radyo GenSan gikan sa National Bureau of Investigation (NBI).
Gikabutyag nga kasamtangan nang ginasayod ang gikahimutangan karon ni Apolinario.
Human kini sa gilusad nga search operation sa mga KAPA offices sa pipila ka bahin sa nasud kaniadtong Lunes, apil na sa panimalay niini sa City Heights, GenSan.
Gituuhan usab nga nag-leak ang impormasyon kalabot sa nasampit nga operasyon una pa man kini gipatuman kagahapong adlawa.
Kini matud pa ang rason nganong halos wala nay ebidensya nga nakuha gawas sa usa ka puti nga bullet proof nga SUV sa panimalay niini dinhi sa siyuadd nga panag-iya matud pa ni Apolinario, apil na sa mga buhatan sa usa pa ka investment group nga ALAMCCO.
Una nang gibutyag ni Justice Sec. Menardo Guevarra nga unsa mang adlaw arestuhon na si Apolinario ug mga opisyal sa nasampit nga investment scam.
Samtang sa press conference usab ning hapuna, gikumpirma ni NBI spokesperson Ferdinand Lavin nga gilaumang magpasang-at sila ug large scale ug syndicated estafa batok kang Apolinario ug mga opisyal sa KAPA.
