GENERAL SANTOS CITY – Nakig-alayon na ngadto sa Provincial Environment and Natural ResourcesOffice-Sarangani aron masayran ang rason kung unsa ang gikamatyan sa balyena human nga nakaplagan nga patay sa baybayon sa Barangay Gumasa, Glan, Sarangani.
Sa pakighinabi sa Bombo Radyo Gensan kang Kagawad Joselito Abayon, gibutyag niini nga anaa sa 5 ka adlaw ngadto sa usa ka semana na ang patay lawas sa nasangpit nga sperm whale kung asa anaa na sa state of decomposition.
Gibanabanaan nga anaa sa 3,ooo kilos ang kabug-aton, dies metros ang gitas-on ug lima ka metros ang kalapdon. Wala pa usab nailhan kong lalaki ba o babae ang maong balyena.
Matud ni Abayon, nga ikaduha na nga higayon nga nakakaplag sila ug patay nga sperm whale sa ilang barangay. Sa pahayag ni Kag. Abayon nga usa sa rason nga ginakamatyan sa balyena tungod nakakaon ug mga plastik.
Ang mga opisyal sa Protected Area Management Board kon PAMB og sa Provincial Environment and Natural Resources Offices ang miadto sa area alang sa dugang nga imbestigasyon.
