GENERAL SANTOS CITY – May tambag ang usa ka sports analyst kang Toronto Raptors coach Nick Nurse aron makabawi sa Golden State Warriors sa Game 3 ning adlawa sa best of 7 series sa NBA Finals.
Sa pakighinabi sa Bombo Radyo sa beteranong sports writer nga si Fred Lumba, mas maayong gamiton matud pa sa Raptors ang height advantage sa ilang mga players sama ni Marc Gasol.
Mahimo matud pa niining patirahon si Gasol sa low post aron ma-foul out ang pipila sa mga big men sa two-time defending champion.
Una nang gibutyag sa Bombo Radyo ni Lumba nga gikinahanglang maka-steal sa team nilang Kawhi Leonard ug bisan usa sa Games 3 ug 4 nga matigayon sugod ning adlawa sa Oracle Arena sa Oakland, California, nga balwarte sa Warriors, aron mahibalik kanila ang momentum sa dula.
Gumikan kon mapakyas matud pa sila ug mahimong 3-1 ang serye, posibleng ma-pressure na sila sa pagbalik sa ilang balwarte sa Game 5, ug mas munipis na ang ilang tsansa nga mailog nila ang kampeonato.
