Gikompirmar sa Hamas ang pagkamatay sa ilang senior commander nga si Raed Saad human sa usa ka opensiba sa Israel sa Gaza, nga ilang giingong paglapas sa nagpadayon nga ceasefire.
Sumala sa Israeli military, napatay si Saad sa usa ka airstrike niadtong Sabado duol sa Gaza City, diin kapin sa 25 ka tawo ang nasamdan. Kini mao ang pinakataas nga ranggong lider sa Hamas nga napatay sukad nagsugod ang ceasefire niadtong Oktubre 10.
Sa usa ka video statement, giakusahan sa Gaza chief sa Hamas nga si Khalil al-Hayya ang Israel sa padayon nga paglapas sa kasabutan ug giawhag ang Estados Unidos ug ubang mediator nga pugson ang Israel sa pagtuman sa tigpahunong sa panagbangi.
Sumala sa mga awtoridad sa Gaza, sukad nagsugod ang ceasefire, kapin sa 800 ka pag-atake na ang gihimo sa Israel nga miresulta sa pagkamatay sa labing menos 386 ka mga Palestino. Dugang pa, giingon nga gipugngan gihapon ang pagsulod sa humanitarian aid samtang nag-antos ang daghang lumulupyo sa Gaza human sa Storm Byron.
