GENERAL SANTOS CITY – Gikataho sa National Disaster Risk Reduction and Management Council nga halos 45,000 ka pamilya bugti sa 187,000 ka mga indibidwal sa Davao Region ang naapektuhan sa mga pagbaha ug pagdahili sa yuta tungod sa walay undang nga pag-ulan nga nasinati-an nga epekto sa shearline.
Sa usa ka taho nga gipagawas sa NDRRMC nga kanaidtong Enero 16 nahitabo ang pagbaha ug pagdahili sa yuta sa pipila ka bahin sa Davao de Oro ug Davao del Norte.
Apektado usab sa pagbaha ang daghang barangay sa Mawab, Nabunturan ug Maragusan lakip ang mga munisipyo sa New Corella, Capalong ug Panabo.
Sa kinatibuk-an ang Davao de Oro adunay upat ka lugar ang gibaha samtang siyam ang mihupa. Nakatala usab ug walo ka landslides.
Mukabat usab sa trenta ka lugar sa Davao del Norte ang gibaha.
Gibutyag usab sa ahensiya nga 23 ka road sections ug duha ka tulay ang apektado kung asa onse ka mga kalsada ang dili maagi-an.
Unom ka syudad ug mga munisipyo usab ang walay kuryente. Nakapanghatag na usab ug food packs ang NDRRMO sa mga pamilya nga naapektuhan sa pagbaha.
