GENSAN- Nailhan na sa kapulisan ang gunman sa pagpamusil nga nahitabo sa Manga Street, Barangay Ligaya ning dakbayan sa Gensan niadtong buntag adlawng Lunes.
Matud ni PMajor Renato Dunca Jr., Station Commander sa Lagao Police Station, bisan pa, dili una ipadayag ang ngalan niini samtang nagpadayon ang ilang imbestigasyon.
Sa karon, nagpadayon ang kapulisan sa proseso sa pagkuha og mga testigo ug sa ilang mga sworn statement aron makapasaka na og lig-on nga basehan sa pagpasaka og criminal complaint batok sa mga suspek.
Gibutyag usab sa nasampit nga opisyal, nga riding-in-tandem ang mga responsable, diin ang driver sa motorsiklo mao usab ang giila nga gunman.
Gituohang personal grudge ang motibo sa krimen, tungod kay adunay nakabangi ang biktima nga si Raffy Lambac kaniadtong miaging tuig ug gituohan nga adunay kahibalo ang biktima mahitungod sa maong isyu.
Kahinumdoman nga naigo usab sa pagpamusil ang anak nga lalaki sa biktima tungod kay ihatud unta niini sa eskwelahan ang nasampit. Anaa pa karon sa ospital ang biktima tungod sa mga samad pinusilan nga naangkon.
