Gilauman nga molungtad ang gubat tali sa US ug Israel ug Iran og upat ngadto sa walo ka semana, sumala sa Department of Foreign Affairs (DFA).
Si Usudan miingon nga ang gubat tali sa US ug Israel ug Iran dili sama sa gubat tali sa Israel ug Iran nga milungtad lang og 12 ka adlaw.
Samtang, gipasalig sa Department of Foreign Affairs nga ang tanang communication network sa ahensya sa Middle East kay operational na ug magamit sa mga OFW ug uban pang mga Pilipino nga nalambigit sa gubat sa nahisgutang rehiyon.
Gipasalig ni DFA Asec. Ezzedin Tago sa komite nga ang tanang klase sa komunikasyon sa mga ahensya sa mga nasud sa Middle East nagpabilin nga operational bisan pa sa mga naunang report nga walay nitubag sa mga hotline nga gihatag.
Gimandoan usab sa ahensya ang mga foreign service post nga ipadayon ang pag-abli sa mga linya ug motubag dayon sa mga tawag ug tabang nga gikinahanglan sa mga Pilipino didto.
Kabahin niini, si Department of Migrant Workers (DMW) Secretary Hans Leo Cacdac miingon nga ang ahensya nakatabang na sa kapin sa 6,200 ka mga OFW nga onsite.
Lakip sa mga tabang nga gihatag mao ang puy-anan, pagkaon, tubig ug uban pang mga batakang panginahanglan.
Matod ni Cacdac nga ang ahensya naghatag usab og tabang pinansyal sa mga nawad-an sa ilang trabaho ug kulang sa kwarta, ingon man serbisyo sa transportasyon sa mga gusto nga mobiya ug mopauli.
