GENERAL SANTOS CITY – Mas gipakusgan karon sa City Veterinary Office ang ilang kampanya batok sa rabies.
Kini ang gibutyag ni Dr. Efraim Marin, ang city veterinarian, sa pakighinabi sa Bombo Radyo.
Sumala pa nga kaniadtong 2017, nakatala ug 36 ka kaso sa rabies sa siyudad hinungdan nga nahimong
numero uno ang GenSan.
Mikunhod matud pa kini miaging tuig nga anaa na lang sa 20.
Karong tuiga, target matud pa nilang mapaubsan pa gyud ang maong ihap, nga mas ubos sa 10 ka kaso.
Gumikan niini, gire-organize karon sa City Vet ang anti-rabies program.
Matud pa nga mag-full-force sila sa City Vet aron mas pakusgan ang pagbakuna sa mga iro ug uban pang
mananap batok sa rabies, hilabi na nga hapit na usab ang summer kung asa daghang mga bata ang magsuruy-suroy tungod walay klase.
Sa karon may paigo matud pa silang pondo sa bakuna ug nagapahigayon ug mass vaccination sa mga
barangay katambayayong ang City Pound aron manakop ug mga stray dogs.
Unahon matud pa nila ang mga dagkong barangay nga makonsiderang high risk areas sa rabies.
Dungan niini, nanawagan si Dr. Marin sa mga may iro ug uban pang mananap nga mahimong responsibleng pet owners.
