GENERAL SANTOS CITY – Matigayon ning adlawa ang ground breaking sa City Museum ning dakbayan. Ipahigayon kini sa old city hall building, partikular sa kanhing buhatan sa COMELEC, alas-4:00 sa hapon, kung asa pangunahan kini nilang Mayor Ronnel Rivera ug Vice Mayor Shirlyn Bañas-Nograles.
Sa maong museum planong makit-an ang mga butang nga may kalabutan sa GenSan ug mga karaang litrato sa mga pioneers, mga kanhing opisyal ug katawhan nga may dakong papel sa kasaaysayan sa siyudad, ingon man sa mga sikat o bantog karon nga mga Generals, nga naghatag ug dungog sa Gensan, ug ang ilang mga memorabilia.
Kahibaluan nga P10 milyon ang inisyal nga gigahin sa lokal nga pangamhanan ning siyudad alang sa maong museum.
Kahibaluan usab nga planong magpahigayon ug cultural mapping sa siyudad, kung asa makatambayayong ang mga representante gikan sa University of Santo Tomas Graduate School–Center for Conservation of Cultural Property and Environment in the Tropics.
Makatambayayong usab nila ang DepEd, pinaagi sa mga Araling Panlipunan teachers nga maoy magsilbing enumerators.
