Magtukod ang gobyerno ug 300 ka day care centers aron mapun-an ang kakuwang sa mga lugar diin ang mga bata walay access sa pag-atiman sa bata ug edukasyon.
Kini maoy gipahibalo sa press briefing sa Malacañang ni Department of Education (DepEd) Secretary Sonny Angara human sa ceremonial signing sa Malacañang alang sa mga lagda sa katukoran sa local government units (LGUs) sa mga day care center, ilabi na sa mga LGU nga naglisod sa pundo.
Matod ni Angara, base sa pagtuon sa UNICEF, 78% sa mga bata nga ubos sa singko anyos wala sa day care centers tungod walay pasilidad nga natukod alang kanila.
Dugang pa niini nga ang Department of Budget and Management (DBM) nigahin og P1 bilyon nga pundo sa pagtukod og 300 ka day care centers diin kadaghanan niini ibutang sa Visayas ug Mindanao.
Matod niya ang nag-unang tumong sa DepEd mao ang Bangsamoro Autonomous Region in Muslim Mindanao (BARMM) nga nakasinati sa labing taas nga lebel sa kagutom sa nasud.
Dungan sa katukoran sa mga day care center, dungan nga ipatuman sa Department of Social Welfare and Development (DSWD) ang ilang feeding program aron matubag ang problema sa malnutrisyon, subay sa tinguha ni Presidente Ferdinand Marcos Jr
