GENERAL SANTOS CITY – Balhog sa selda sa Glan PNP ang usa ka civilian agent sa Philippine Army human kini misukol sa dihang gisita sa kapulisan tungod may gidala dalang armas.
Nailhan ang maong dinakpan kang Reynaldo Olarde, usa ka security guard ug residente sa Purok Stella Mariz, Barangay Tambler ning dakbayan.
Matud kang Police Chief Inspector Neil Wadingan, hepe sa Glan PNP nga may nag-report kanila kalabot sa kadudahang tawo sa pantalan sa Glan ug didto girespondihan tungod na usab kay alerto sa posibleng pagsulod sa Maute group.
Apan dihang arestuhon na ang maong lalaki, nagdumili kini ug misukol ug nakit-an ang dalang armas niini nga nakasulod sa bag.
Gipresenta ni Olarde ang mission order ug acknowledgement receipt gikan sa 10th military intelligence battalion.
Apan gidakop kini tungod sa pagsukol sa kapulisan, hinungdan mag-atubang og kasong obstruction of apprehension and prosecution of criminal offender.
