Miabot sa double overtime (2OT) ang panagsangka tali sa Gilas Pilipinas ug New Zealand, diin napildi ang Gilas sa iskor nga 106-102 batok sa Tall Blacks sa nagpadayon nga FIBA World Cup Qualifiers.
Naapas sa New Zealand ang usa ka puntos nga labaw sa Pilipinas sa ikatulong kwarter ug naparehas ang iskor sa 83-all sa pagtapos sa ika-upat nga kwarter.
Sa pagsulod sa unang overtime (OT), nagpabilin nga hugot ug dikit ang duwa sa duha ka koponan hangtod nga natapos kini sa 93-all.
Sa ikaduhang overtime (2OT), unang nakalamang ang New Zealand sa unang duha ka minuto, apan dali usab kini naapas sa Pilipinas ug nakakuha pa og usa ka puntos nga abante, 97-96, sa tunga-tunga sa 2OT.
Duha ka minuto sa wala pa matapos ang duwa, napataas sa Pilipinas ang ilang kalamangan ngadto sa upat ka puntos, 100-96, pinaagi sa mga clutch shots ni Justine Brownlee.
Apan dali usab kining nabawi sa New Zealand ug naparehas ang iskor sa 100-all, usa ka minuto sa wala pa ang final buzzer.
Sa ulahi, wala na makabawi ang Gilas human sa sunod-sunod nga mga foul nga gitawag pabor sa New Zealand, lakip na ang usa ka sayop sa inbound pass sa katapusang mga segundo sa duwa. Tungod niini, napildi ang Gilas Pilipinas sa Tall Blacks sa iskor nga 106-102.
