GENERAL SANTOS CITY – Gipaniguro sa kapulisan nga dili masayop sa pagpasaka ug kaso batuk sa tulo ka person of interest sa pagpusil patay kang Rustico Tabaosares nga taga Zone 8 Fatima ning syudad.
Matud ni PNP City Director Col. Nicomedez Olaivar Jr. nga gihulat na lamang ang cartographic sa mga suspek aron makapasaka na ug kaso nga Murder batuk sa mga suspek.
Matud ni Olaivar nga nakiglambigit na sa kapulisan ang ig-agaw sa biktima nga mihatag ug pahayag kalabutan sa mistaken identity.
Kahinumduman nga ang biktima ang nagadeliver ug softdrinks sa Fatima gamit ang topdown apan niadtong hitaboa nagmaneho kini sa sakyanan sa iyang ig-agaw ug dihang manaug na atubang sa tindahan nga kuhaan unta niini ug botelya, gipusil kini sa suspek gamit ang caliber 45 pistol.
Wala nakuhaan ug CCTV ang suspek tungod nakasalipod kini sa sakyanan samtang maneho ang motorsiklo nga palayo sa lugar.
Hinuon wala pa mihatag ug pag-ila ang Kapulisan kung si kinsa ang giingon nga mga person of interest tungod padayon pa ang gihimo nila nga imbestigasyon.
