Nagtuo si Senate President Pro Tempore Jinggoy Estrada nga dili motumaw ang “ghost project” kon walay kooperasyon sa Commission on Audit (COA).
Matod sa senador, kinahanglang ipatawag ang mga opisyal sa ahensya sa sunod nga pagdungog sa Senate Blue Ribbon Committee aron pagpasabot sa anomalosong mga proyekto sa gobyerno sa pagpugong sa baha.
Kagahapon, sa privilege speech ni Senador Ping Lacson, iyang gipaambit ang pie-sharing, o giunsa pagputol ang pundo sa flood control projects, diin ang 0.5 ngadto sa 1% ma-adto sa Commission on Audit.
Si Estrada nirekomenda usab nga “heads must roll” o kinahanglang adunay manubag sa kurapsyon nga nalambigit sa mga proyekto sa gobyerno.
Dugang pa niya nga posible usab nga dunay mga empleyado sa Department of Public Works and Highways (DPWH) ang nag-corner sa mga kontrata alang sa usa ka proyekto.
Hinuon, naa ra gihapon sa kamot ni Presidente Ferdinand Marcos Jr., kon tangtangon ba o dili si Secretary Manuel Bonoan.
Kay, wala usab isalikway sa senador ang posibilidad nga wala kahibawo ang kalihim sa mga nanghitabo ubos sa iyang pamunoan, sama sa undersecretary, regional director, district engineer, ug uban pa.
