GENERAL SANTOS CITY – Walay natala nga kaso sa coronavirus disease sa dakbayan kagahapon base sa ulahing datos nga gipagawas sa DOH-Center for Health Development Soccsksargen Region kagahapon dungan sa pagsaulog sa Feast of the Immaculate Concepcion.
Tungod niini nagpabilin sa 1,207 ang total confirmed covid cases sa syudad, human nga walay madugang nga bag-ong pasyente.
Nasuta nga mukabat sa 29 ang bag-ong nagpositibo sa sakit kagahapon kung asa 19 niini ang residente sa South Cotabato, upat sa Cotabato City og unom sa North Cotabato.
Nagpangidaron og tres anyos ang pinaka-batan-on nga natakbuyan sa covid 19 samtang 80 anyos ang pinaka-edarang pasyente.
Sa pagkakaron, nagpabilin sa 357 ang aktibong kaso sa Region 12 kung asa gapanguna ang GenSan nga mitala og 102, gisundan sa Cotabato City nga adunay 94 ka kaso.
Ang South Cotabato adunay 81 ka kaso, Sarangani may 47 pa ang padayong nagpaayo, sa North Cotabato may 21 og sa Sultan Kudarat may dose pa kabuok nga kaso sa COVID 19.
Samtang mukabat na sa 3,634 ang nakarekober gikan sa sakit human nga nadugang kagahapon ang 28 nga bag-ong nagmaayo sa sakit.
Misaka na sa 144 ang COVID 19 related death sa rehiyon human nga kagahapon nahunusan sa kinabuhi ang 96 anyos nga babaye nga residente sa Koronadal South Cotabato.
Gawas sa GenSan, wala usab bag-o nga kaso sa covid 19 ang Sarangani Province og Sultan Kudarat kagahapon.
