Dako ang kalipay sa Schools Division Office (SDO) General Santos City human giila ang ilang Division Sports Coordinator nga si Dr. Ronald S. Radin isip usa sa Outstanding Division Sports Officers of 2025 sa gihimong Gawad Pagkilala sa Larangan ng Isports, nga gi-organisar sa Department of Education (DepEd) ug sa Palarong Pambansa Secretariat.
Ang pasidungog gihatag aron pag-ila sa mga edukador ug opisyal sa sports nga adunay dakong papel sa pagpalambo sa isports ug sa pagpangita ug pag-amuma sa talento sa kabatan-onan.
Si Dr. Radin gidayeg sa iyang padayong dedikasyon ug lig-on nga pagpanguna sa mga tigsanay, atleta, ug sports coordinators sa mga eskuwelahan sa General Santos City. Tungod sa iyang mga programa ug inisyatibo, napaligon pa ang sports development sa division ug napadako ang partisipasyon sa mga estudyante sa lain-laing disiplina sa isports.
Matod sa SDO General Santos City, dakong garbo kini alang sa tibuok division ug inspirasyon sa tanang magtutudlo ug estudyante nga ipadayon ang paglambo sa larangan sa isports.
Sa iyang bahin, nagpasalamat si Dr. Radin sa Bombo Radyo General Santos tungod sa suporta ug sa pagpaabot sa iyang mga kalihokan ug programa sa social media. Matod pa niya, tungod sa mga post sa Bombo Radyo, mas nailhan siya sa mga katawhan ug mas daghang nakaila sa iyang paningkamot alang sa sports development sa dakbayan.__
Gipaabot usab sa DepEd ang pasalamat ug pagdai sa mga sports officers sama ni Dr. Radin nga padayon nga nagmugos aron mapalambo ang sports spirit ug teamwork sa mga kabataan sa tibuok nasud.
